La Parole

呢間第一次黎已係三年幾前，呢棟柏廷坊其實有幾間餐廳都係同一個社企run，而重點係間間既食物質素同環境都唔錯，所以我間唔中都會過下黎。

呢間食既都係西餐，先黎左個用橄欖整既complimentary snacks，同行的朋友平時唔食橄欖都話好唔錯。

之後就到松露炒蛋呢個頭盤，松露就用正常貨仔，mushroom就好似之前再醃製過的，不過不失。

主菜時間我就點左薄燒牛肉，牛肉就medium岩岩好，薯仔反而是意外地好食。不過左下角既火腿在配搭上有少少無厘頭。

朋友吃的煮嘉美雞，口感嫩嫩的，汁煮也很入味，而且雖然是冰鮮雞，但也保持一定的鮮度。

最後是甜品時間，簡單地來個chocolate cake加雪糕，豐富的午餐就完結啦。

G7 Private Dining

今次無啦啦去左一條叫己連拿利既街，目的就係去呢間意大利餐廳。中午唔太full，其實都係坐到20人多d，但私隱度極高，用餐範圍要行過走廊再上樓梯至到。

今日menu已經唔記得有咩，畢竟係大廚Eddy自己口講既，首先上左麵包，係自家新鮮整既，當然夠熱夠新鮮，仲可以再加蒜頭或者olive oil一齊食。

之後係四小款既前菜，左邊係煙薰魚，再隔離後係小蝦，再有好似煙火雞texture既，樣樣都好精彩。

到在湯既時間，中間除左有豆蓉之外，再加左蟹肉，lime，仲有少少spicy添，完全係刺激味蕾囉。

到左主菜時間，一行三人都係order呢個，煮得又岩岩好，牛肉固然夠嫩，連薯蓉都可以做到好精細既texture，軟軟既但又同時好有密度，算係食薯蓉食左咁多年，最好食既一次。

最後甜品都係食番個tiramisu，味道都好正宗，酒既份量又岩岩好。

入面仲有個open area，如果天氣好又暖暖地既話，一定坐得好舒服。值得搵次再黎。

Pho Bar

今次跟風黎到呢間新開既食越南牛肉河既專門店，經過左各位既推介之後，就先見到一條人龍。還好，都係等左4個字左右。

入到黎之後，你會見到張好似一蘭既tick tick紙，俾你揀食邊個set, 有咩配料，使唔使加大，同埋食咩麵咁，凍飲加7蚊，不過唔提供熱飲既。

我叫左supreme set, 有咩就唔記得啦，除左牛腩太硬，生牛肉熟左d之外，但其他都唔錯。佢雖然有普通生牛河叫，但唔太推介，怕佢會煮得太熟。其他我就唔特別評論，唔係唔好食，而係自己道行未夠，冇食過最正宗既應該係點。

之後再追加既春卷同炸著條，竟然係反高潮地覺得唔錯，冇呃你，我堅係建議過黎食小食既，有圖有真相。

兩條友食完埋單好似250蚊左右。中環黎講唔太貴，但人就無可避免多左d。

Craftsteak Open Fire Cooking.

已經係上兩三個星期來的一間餐廳，主要係食grilled food既，中午幾乎包場，但我明明見過係夜晚都幾full下。其實soho呢邊中午去冇咩人，價錢又唔算好貴，所以有時間都會過下黎。

首先第一道係grilled ceaser加豬腩肉，其實已經好有罪惡感，豬腩肉當然夠肥，但我決定唔理，豁出去啦。至於生菜原條上都係第一次見。

呢個好似好清既Wedge Salad，仲有蝦同牛油果，食沙律冇咩求既，最緊要d菜新鮮就得啦。

主菜輪到pork sausage，其實見到都heavy，香腸固然夠肉汁，同行的朋友食唔哂都已經飽了。

呢個肯肯定係本日重點，中午食10oz真係好誇，同時又冇overcook，Ribeye又好juicy，所以食食下已經差不多清哂啦。

料理人上田

呢棟Stanley 11既餐廳開完又執，執完又開，今次輪到介紹番呢間料理人上田。

其實都係無意中睇到，lunch唔算太貴，野食又有d特色，應該可以頂到一段時間。

至於今日就食呢個鹿兒島牛肩扒，只是輕輕係面燒左陣，但之後是凍上的。牛味就夠既，仲要幾好食，而且其他配菜好俾心機整，仲要係加埋一只係$150, 冇唔再食既理由囉

見城日本料理

呢間真係由我識得搵野食開始，到而家都係咁穩定，食到棉登徑成條街既日本野開完之後都執哂啦，仲係度做緊。其實別館味道都唔錯，所以如果冇book都係執赫德道個間。

去到已經1:50pm，好彩仲入緊客，最快真係摸門釘食唔到，因為真的是諗住食壽司，當係新年賀下又好，止下癮又好啦。

新年有賀年食品送，最右的栗子堅甜，和我11月去日本食的差唔多。左三左三兩樣都係甜的，最中間是黑豆。

甚至連湯都變左做年糕湯，好齊料的，賀年嘛，當然是要來點特別的。

其實每次好例牌叫自選壽司，價錢算係10年如一日，10年前食緊170，而家都仲係190（呢個價好似12定13到而家架啦），質素冇變過，收貨了。中拖羅都係鮮甜，油甘魚當日道普普通通啦。

嗱，上圖既帶子其實唔係成日有做壽司set，其他野都算係定番，味道都非常定番，即是冇咩好驚喜但又冇投訴個種，但思鄉病發既話，都夠頂一陣架啦。至於夜晚係點，sorry，我冇食過，要搵食過既朋友出聲啦。

次次都話baby吞拿係special，但佢老是常出現的，幾乎沒有一次例外。

老實講，食左10年而又keep住食佢，除左係熟悉既感覺之外，質素keep得住冇跌係主要原因囉。

La Vache

今次唔寫lunch，寫番夜晚飯先。呢間好耐之前想食，但無奈上次去個陣人太多，搞到等太耐最後放棄左。難得新年唔使等太耐就好啲，本應預左要等45分鐘既，最後只係等左20分鐘搞掂。

呢餐主菜得一款，就係法式牛扒，其實香港都開左幾間類似既餐廳，反而呢間係開得最耐，生意最好既一間（但不是最好食的）。

首先黎個salad先，味道是對辦的，沒投訴，麵包也是暖暖，不算非常好食但肯定是收貨的啦。

牛扒叫了medium, 沒有過熟，也按傳統送上鐵碟讓牛扒保溫（有一半牛扒都在鐵碟上，業界標準來的），薯條任吃，基本上吃薯條都幾乎吃飽。不過，附上的sauce似乎有點遜色，應該是珠玉在前嘛，但牛扒是肉味偏重的一類，整體還是不錯。

其實如果是未試過吃法式牛扒的話，建議一去，老實講，之前中環有一家L'Entrecote De Paris,但最衰佢呢兩三個月執鬼左。

美利堅京菜

呢間京菜，其實搭車個陣已經成日經過，不過試就真係第一次。老實講，堅似鹿鳴春，但未試過夜晚，真係唔知邊間好食d。

原本呢間有做午餐，一個涼菜，自選三個小菜，仲有三鮮炒麵加甜品，夠飽了。

前菜係由腐竹，豬肉同程雞腎整出黎，名已經唔記得，但蒜味好勁，重口味人士應該會鐘意。

之後到主菜時間，揀左童子雞（其實同普通的差唔多）、蔥爆牛肉（和鹿鳴春幾乎一樣）和腿茸奶油津白（又好足料囉）。

咁既陣容四個人每人唔使一舊水，而家都好難搵啦，而且小菜有超過40款任揀，可以去幾次都未食哂佢d野。

Bouchon Bistro Francais

講明是lunch業務，當時是介紹一下中午有咩好野食。呢次出場係我好間唔中去一次既。

先上場既係前菜，首先係煙三文魚，好正路熟悉既味道

再有田螺，即係蝸牛啦，同法國食既差唔多

Platters樣樣都有d，最好食係salami

之後到main，呢個係油封腿上再加再兩隻Poached Egg，唔錯

Steak Frites 叫左medium，真的是剛剛好!!

blue mussel都好新鮮下，係個sauce酸左少少囉。

甜品唔算好特別，但交足功課啦，呢個係Pear Crepe，入面好多Custard

Creme Brulee，上面加左塊杏仁餅，但好硬

cheese plate: Chambertin, Blue Cheese

呢間總括黎講合格有餘，菜色就間中轉下咁，得閒過下來食都ok~~

期間限定 - 潮記大作戰

由2月中至2月尾，呢檔潮記粉麵由於唔做，但又唔想就咁交租，結果有班人搞左個潮記大作戰，每日日頭都有唔同既野食，而夜晚就整關東煮。

夜晚關東煮個老細本身係designer，呢期未搵野做就係度做住玩，之後佢話都係諗住做番designer，原因係做designer搵咁_多錢 (原話直錄)。話時話，計埋外面，間野都係坐得落10個人左右，而且岩岩撞正落下雨冇咩人黎，唔係都好大機會要等好耐。

呢日都係食左d standard野，包括左上面個關東煮，個汁又唔錯，蘿蔔又好入味。呢一日係冇素魚餅同素雞丸。唔，蓮藕可以煮耐d。

之後就輪到貓飯，其實呢個係日本人細細個既時候，唔肯食飯個陣(乙水)佢地食飯既產物來的，主要係撈左醬油、紫菜和木魚。

食到中間就有呢個泡菜煎餅，呢個好快就清哂，交足功課啦。不過有段小插曲，話說老細以為只係需要整一個煎餅，點知等呀等，原來係度嘆緊煙，就隨口問下係咪未整囉，當然見佢咁有興致，梗係等埋佢食完先啦。

其實呢個至係主角，黑糖紫芋小丸子，基本上都係為左呢個而來，一開始已經見佢好有心機咁搓呀搓，而且整到好紫，所以真係落足料，咬落又好煙韌，糖水底又好夠味。

所以呢，呢一餐完全冇投訴囉，而且又岩岩好夠哂飽。